AP-a lirthei chesualah khualzin mi 3 an thi

Arunachal Pradesh-a Tawang-ah kar kalta Inrini khan lirthei a chesual a, khualzin mi pathum an thi.

Arunachal Chief Minister Pema Khandu chuan Tawang tlawha kal khualzinte chuanna lirtheiin vanduaina a tawk chu pawi a tih thu a sawi a, nunna chan khualzin chhungte a tawrhpui thu a sawi. Khualzinte hian Tawang-a Sino-Indian border-a Bumla hmun an tlawh zo an haw lamin vanduaina hi an tawk a, mi pathum an tih bakah hian midang pali-in hliam na tak an tuar a ni. CM Khandu chuan he thil thleng hi Tawang mi te mai bakah state mipuiten an tawrh thu a sawilang bawk a ni.

Nunna chan te hi Kolkata atanga kal nih thu tarlan a ni. CM chuan khualzin mite mai bakah motor khalh tute chu fimkhur hle turin a chah a, tourist hmun te chu kawng a ṭhat loh thu sawiin, khawchin ṭha lo avang pawha fimkhur zual a ngai tih a sawi. District thuneitu, police leh NGO-te pawh kawng leh khaw awmdan ngaichang chunga khualzinte an theih ang anga pui turin a ngen nghal bawk.

Tawang-ah hian October-March hi khual­zin mite zin hun a ni a, Tawang hi ram leilung mawi tak mai a nih bakah, an lui leh monastery te hian khualzinte a hip nasa hle a ni.