Tuilian vangin Manipur-ah mi 22 an thi

Manipur Chief Minister Biren Singh chuan kuminah ruahsur nasat vanga tuilian vawi nga lai a thlen thu leh, mi 22-in nunna an chan thu Pathianni khan a sawi.

Kumin chhunga tuilian hian thlai, kawng­pui leh lei tam tak a tihchhiat mai bakah, bungrua man tam tham tak hu pawh a tihchhiat thu a sawi. Chief minister chuan heng kawng leh lei chhia te hi sorkar chuan ruahsur nasa avangin an la siam ṭhat mai theih lo tih sawiin, fur a zawh velah siamṭhat hna thawh a ni ang, a ti.

National highway leh state highway-te chu tuilian vanga a chhia tih chu a pawm thu leh BJP sorkar chuan Manipur state chhunga kawngpui te chu a hma thei ang bera siamṭhat chu an tum ber a nih thu CM chuan a sawi. Biren Singh chuan Imphal leh a chhehvel kawngpui chhe zual chu siam zawh a nih tawh thu a sawi bawk.

Manipur-ah hian tuilian hian chhiatna a thlen nasa hle a, nunna chan bakah, hliam tuar eng emaw zat an awm a, in leh lo chan eng emaw zat an awm bawk. Kum dang zawng aiin ruahtui a tla tam nia tarlan a ni a, hei vang hian chhiatna thleng pawh hi a nasat phah a ni.