Tuilianin rel kawng a tihchhiat tam zawk siam ṭhat a ni tawh : NFR

Assam, Bihar leh West Bengal-a tuilian avanga rel kawng, lei leh inbiakpawhna chhia tamtak siamṭhat hna chu Railway lam hotute chuan ngawrh taka an beih mek thu kar kalta zirtawpni khan tarlan a ni. Hetih lai hian hmarchhak huam chhung bika rel kawng chhia te chu siam zawh thawhkhat a nih tawh niin Northeast Frontier Railway (NFR) chuan an tarlang bawk.

NFR chuan rel hmanga hmarchhak state-te leh leh state dang inkal­pawhna te chu siam zawh thawhkhat a ni tawh a, rel 71 zinga 48-te chu an service leh tawh thu a sawi. NFR Chief Public Relations Officer Pranav Jyoti Sharma chuan, kawng chhia te hi siamṭhat a nih veleh rel 28 dang te hi chu service tir theih beisei a ni, a ti.

Assam, Bihar leh West Bengal-a tuilian leh leimin tam takin rel kawng, lei, inbiakpawhna leh culvert tam tak a tihchhiat avangin northeast-a rel service tam tak chu August 10 atang khan an chawlh phah hial a ni. Sharma chuan Railway lam hotuten theitawp an chhuah hnuin bungraw phur rel tam tak chu August 29 khan an service leh tawh a, September 3 aṭang khan passenger phur rel te pawh an service leh thei tawh thu a sawi bawk a ni.

Sharma chuan rel kawng siamṭhat nan hian vaibelchhe 63 hman a nih tawh thu leh, Katihar division-ah ringawt pawh vaibelchhe 45 sen a nih tawh thu a sawi. Alipurduarh-ah pawh lei siam nan hian vaibelchhe 8.7 sen a nih thu a sawi bawk.

NFR thuchhuah chuan Rail­way lam pawhin vaibelchhe 209 an hloh thu leh heng zinga vaibelchhe 44 te chu passenger te ticket refund-na a nih thu an tarlang a, Engineers of Army’s Military Engineering Services (MES) ten rel service leh theih nan hian nasa taka an puih thu an tarlang bawk a ni.

NFR-te hnuaiah hian northeast state pariat bakah, West Bengal leh north Bihar-ah district 5 a awm a ni.