Hight Court-in Sikkim sorkar khinletna hnawlsak

Sikkim High Court chuan Sikkim Krantikari Morcha (SKM)-te'n Sikkim sorkar an khin letna chu a hnawlsak.

Sikkim sorkar hian kum 2010 khan hriattirna chhuahin, Central Bureau of Investigation (CBI)-in sorkar hnathawkte a chhui dawn a nih chuan sorkar phalna lak phawt a ngaih thu a tarlang. Sorkar hnuaia officer leh public representative-te chu sorkar remtihna lo chuan CBI chhuitir a remtih loh thu a sawi. Hei hi Sikkim Krantikari Morcha (SKM) president P S Tamang chuan khing letin, High Court-ah a zualko a ni. Petition-ah hian SKM MLA Kunga Nima Lepcha bakah, midang pariat ten an hming an ziak a ni.

Chief Justice Agnihotri chuan state sorkar chu CBI-te'n eiru leh, thil danga inhnamhnawiha puhte chhui an nih leh nih loh tur chungchangah thuneihna a nei tih sawiin, petition hi hnawl a nih thu a sawi. Justice Agnihotri chuan CBI koh luh leh koh luh loh chungchang chu state sorkar thuneihna a nih avangin Sikkim Krantikari Morcha-te'n sorkar thupek chhuah sut leh tura an khin letna chu hnawlsak an ni, a ti.

Hetih lai hian SKM chuan Chief Minister Pawan Kumar Chamling chu eirukna-a inhnamhnawihah puhin, CBI chhuitir an phut thu an sawi.

Chief minister bakah hian council of minister zinga eirukna laka fihlim lo eng emaw zat an awn thu an sawi. Mahse heng mite hi CBI chhuitir tur chuan state sorkar remtihna lak a ngaih avangin, kum 2010-a hriattirna lo chhuah tawh hi sut leh an phut thu an sawi.