Demonetisation-in retheihna a tibo dawn : Union minister

Union Minister of State for Defence Subhash Ramrao Bhamre chuan Shillong-a Mudra Promotion Campaign-a a thusawina-ah, Rs. 1,000 le Rs. 500 note tih thihin ramchhunga retheihna a umbo tur thu a sawi.

Minister Bhamre chuan, demonetisation hi damdawi ang a ni a, retheihna natna chu khuareiah a tidam dawn a ni, a ti. Damdawi zawng zawng a thlum vek lo tih sawiin, damdawi thenkhat chu a kha a, mahse chu chu mihringte dampui chu a ni, a ti. Prime Minis­ter Narendra Modi-a kaih­hruai sorkarin pawisa note lian a tih thih hnuah India ram chuan pawisa note hman tlemna lam kawng a zawh thu leh digitally enabled society-a siam thei turin mitin ṭanrual a ṭul thu a sawi bawk.

Mudra Promotion Cam­paign-a a thusawiah hian Bhamre chuan Prime Minister-in a scheme thehchhuah pahnih Pradhan Mantri Mudra Yajona (PMMY) leh Stand Up India-te chu thalai nuai tam tak te nun thlak danglamtu a nih tur thu a sawi bawk. PMMY scheme hnuaia hma lak tawhna te chu sawiin vaibelchhe nuai 9 aia tam mah se employment atan loan an pechhuah tawh a ni, a ti. 'Stand Up India' scheme chungchang pawh sawiin he scheme hnuaiah hian sumdawnna lam bulṭan duh te tan bank loan nuai 10 atanga vaibelchhia khat inkar a lak theih thu leh, bank-te chuan ST, SC leh hmeichhe pakhat tal an branch aṭanga loan an pek tur thu a sawi bawk a ni.

Minister chuan sum­dawnna ṭan turin ST ca­tegory-ah mi 1,747-te chu loan cheng vaibel­chhe 346 hu vel pekchhuah an nih tawh thu leh hmeichhia 33,142 hnenah loan cheng vaibelchhe 37,319 hu an pek tawh thu a sawi. Social security scheme chungchang pawh sawiin minister chuan he scheme hnuaiah hian thil pathum- Pradhan Mantri Jeevan Jyoti Bima Yojana, Pradhan Mantri Suraksha Bima Yojana and Atal Pension Yojana-te hi an awm thu a sawi bawk a ni. Suraksha Bima Yajona hnuaiah mi vaibelchhe 11 an inziahluh tawh thu leh Jeevan Jyoti Bima Yajona hnuaiah mi vaibelchhe 3.5 an inziahluh tawh thu a sawi a, Atal Pension Yajona hnuaiah mi nuai 67-in hamṭhatna an dawn tawh thu a sawi bawk.

He hunah hian Megha­laya Taxation Minister Zenith M. Sangma pawhin thu sawiin sorkar-in sum leh pai chungchanga a puih theih dan hriatlohna avangin thingtlang lamah sorkar leh bank-a pawisa puk loa hmundang aṭanga pawisa puk an tam thu leh, hei hian anmahniah harsatna tamtak a thlen thu a sawi a ni.