Assam-a hnam parukte sorkar laipuiin ST status pek remti

Union Minister of State for Social Justice Ramdas Athawale chuan Assam sorkar-in an state chhunga hnam paruk hnena Scheduled Tribe status pek a rawt te chu sorkar laipuiin a pawmpui thu a sawi.

Assam sorkar chuan hnam hnuaihnung - Koch-Rajbongshi, Tai-Ahom, Chutiya, Moran, Muttock leh Adivasi tea-tribe-te chu ST status pek a nih theih nan sorkar laipuiah rawtna a thlen a, hei hi sorkar laipui chuan a pawm a ni. Minister Ramdas Athawale chuan Prime Minister Narendra Modi pawhin heng hnam te hi ST dinhmuna a dah ngei tur thu a sawi a ni, a ti. Sorkar laipuiin Assam sorkar rawtna hi pawm mah se, rawtna hi Scheduled Tribe Commission-in a enfiah a an pawmpui a ngai dawn a, hemi hnu hian Parliament-ah bill puluh a ni ang. Bill hi pass a nih chuan heng hnamte hnenah hian ST status hi pek an ni ang.

Minister chuan heng hnam paruk te mai bakah hian Assam-a Kalita leh Brahmins hnam ṭhenkhat, dinhmun chhe taka awm mek te pawh sorkar laipui chuan hamṭhatna pek a duh thu a sawi tel bawk a, heng hnam zingah hian dinhmun chhe taka ding mek mi tam tak an awm thu a sawi a ni.

Ramdas Athawale chuan Assam sorkar-in sorkar hnathawk, an nu leh pa upa tawh takte enkawl ṭha lo te an hlawh 10% cut sak tura thuchhuah a siam chu fakin, Assam Chief Minister Sarbananda Sonowal chu huaisen taka thutlukna a siam avangin fak a phu a ni, a ti. State dang pawn hei hi entawn se a duh thu leh, old age home siam chu thil ṭha ber a nih loh thu a sawi a, nu leh pa te enkawl hi mitin tihmakmawh a nih thu a sawi bawk.

Assam-ah hian rualbanlo mi 4,80,065 an awm a, anni enkawlna tur hian state sorkar chuan bugdet atan cheng vaibelchhe 225 a dah a ni. Assam sorkar hian rualbanlo te tan hian zirna leh hna zawnna lamah reservation 5% a dah belh bawk. Rualbanlo mi 680 te chu department hrang hrang 54-ah an thawh mek thu minister hian a sawi bawk a ni.