Mi-17 Chopper tlak chhan khawl lam fel loh vang : IAF Chief

Air Chief Marshal B S Dhanoa chuan Arunachal Pardesh-a Indian Air Force (IAF) helicopter tlak chhan chu khawl lam fel tawk loh vang a nih thu a sawi.

Arunachal-a Tawang-ah kar kalta Zirtawpni khan IAF Helicopter, Mi-17 chu a tla a, mi pasarih an thi a ni. Chetsualna thlen chhan hi chhui chian a nih hnuah khawl lam chian tawk loh vang a nih thu Air Chief Marshal chuan a sawi a, helicopter mei hmawr lamah thil dik lo a awm a ni, a ti. Mi-17 V5 medium-lift chopper tlaah hian mi pasaih an chuang a, an thi vek a ni. Thi zingah hian IAF mi panga an tel a, pahnih chu pilot an ni. Anni bakah hian midang pahnih ten nunna an chan bawk.

IAF official-te'n an tarlan dan chuan helicopter hi a tail rotor a function lo a, hei vang hian vanduaina hi a thleng ta a ni. Hetih lai hian a engine lamah chuan harsatna a awm lo a, a hnung vir a mumal loh vangin vansanga an thlawh laiin lei lamah an tla thla ta nia tarlan a ni.

Mi-17 V5 medium-lift chopper hi Russia company siam a ni a, sorkar laipuiin Indian Army-te'n Sino-India border tlang rama an hman tura a lei a ni. Air Chief Marshal B S Dhanoa chuan vanduaina thleng hi pawi a tih thu sawiin, tun hnuah hetiang thil hi a thlen tawh lohna turin fimkhur a pawimawh thu a sawi bawk.