Manipur CM-in highway patrol vehicle 12 vai liam

Manipur chief minister N Biren Singh chuan Thawhlehni khan Imphal-a Chief Minister Secretariat-a Western Gate aṭangin GPS-enabled highway patrol vehicle 12 a vai liam.

Patrol vehicle vailiam hi a thawh thumna niin, Tamenglong leh Noney district tan pathum ve ve, Kangpokpi, Senapati leh Tengnoupal district tan pahnih ṭheuh pek an ni ang.

May 13 khan a thawh khatna atan Senapati district tan motor panga leh Kangpokpi district tan pathum vai liam a ni a, June thlaah Tengnoupal district tan motor panga leh Tamenglong district tan pahnih vai liam a ni bawk.

Chief Minister chuan GPS-enabled highway patrol vehicle chu national highway-ah thil thleng a awm a police-te chak zawka hma an lak theihna tura ruahman a ni tih sawiin, patrolling vehicle awmna hi police headquarters aṭangin hriat theih zel a ni dawn a ni, a ti.

State chhung dan leh thupek dinhmun pawhin a ṭha chho leh tih sawiin, CM chuan oil tanker-te pawh security convoy pek an ngai tawh lo tih a sawi. A kaihhruai sorkar chuan state mipuite himna a ngaih pawimawh thu leh, police-te pawh mipuite nena inpawhna ṭha an neihna turin buatsaih a, thuam ṭhat zel a ni tih a sawi bawk.

Manipur sorkar chuan India-Myanmar border-ah dan loa pem lut leh, ruihhlo tawlh luh ṭhin venna turin police station 34 sak belh a tum a, hna pawh thawh ṭan a ni tawh tih CM Singh chuan a sawi bawk. Manipur-a district panga - Chandel, Tengnoupal, Kamjong, Ukhrul leh Churanchandpur district-te chuan Myanmar hi an ri a ni. Myanmar nena an inrina, km 398 chuanga thui zingah km 5.3 chauh hung a la ni.

Kum 2021 February thlaa Myanmar sipaiten civil sorkar rorelna hnehchhuh a, thuneihna an chan aṭang Myanmar aṭangin dan loa Manipur lama lut hi an pung chho hle a ni. Hemi kum vek March 26 khan state sorkar chuan Myanmar ramria district pangate chu Myanmar mi, dan loa lutte awmna tur camp siam lo tur leh, rawn lutrute pawh ṭawngkam ṭha taka lo hnar zel turin a ti a ni. August thla khan state assembly chuan, an state-a dan loa khawsate dapchhuah an nih theihna atan National Register of Citizens (NRC) hmanna tur resolution chu lungrual takin an lo pass tawh bawk.