Naga hel NSCN-K-te'n Arunachal-a Army base an bei

Naga hel, National Socialist Council of Nagaland-Khaplang (NSCN-K)-te chuan Thawhlehni khan Arunachal Pradesh-a Indian Army base an bei a, thi leh hliam an awm hriat a ni lo.

Army thupuangtu Chiranjeet Konwer chuan, NSCN-K-te hian Niausa area-a Army base hi zing lam dar 1:15 velah an bei tih sawiin, beih tawkte hi Longding battalion-te an nih thu a sawi. NSCN-K-te'n social media lama sipai 40 vel kaphlum a, mi tam tak hliam anga an thehdarh chu thu belhchian dawl lo a nih thu a sawi. Hetih rual hian helte nen hian hun rei tak chhung an inkap zui tih sawiin, silai bakah grenade pawh 10 vel lai an tipuak niin a sawi. NSCN-K-te hian Army base beih nan hian rocket, 40 mm, mortar leh bomb chak tak an hmang tih an sawi a, thi leh hliam awm loin an inthiarfihlim leh thei niin an tarlang ve bawk. Mahse Army thupuangtu chuan NSCN-K-te thu thehdarh hi thubelh chian dawl lo a nih thu a sawi.

September thla khan Indian Army-te chuan NSCN-K-te lakah hian beihpui an thlak tawh tih an sawi a, Myanmar ram chhung Langkhu khuaah hel dap chhuah hna hi an thawk a ni. Naga helte hi Myanmar ramri depah an khawsak avangin beihpui thlak pawh hi a hautak hle a, ramngaw pilril tak takah an inbenbel ṭhin avangin hmuh pawh an harsa hle a ni. India-Myanmar inrina hi km 1,643 zeta thui a ni a, ramri aṭanga km 16 huam chinah ve ve phei chuan mihring chetvel pawh khuahkhirh a ni.

Sorkar laipui chuan Naga hel - National Socialist Council of Nagaland - Isak Muivah (NSCN-IM) leh Naga hel National Socialist Council of Nagaland-Khaplang (NSCN-K)-te chu inremna siampui turin inbiakna a lo neihpui fo tawh a, inrem lailawkna pawh an lo ziak tawh bawk. Mahse he inremna hi NSCN-K te hian chhu chatin pawikhawihna an thlen fo a ni.