Sikkim : Bhaichung-a party HSP-ah Sangram Party inchhunglut

Sikkim chief minister hlui, Nar Bahadur Bhadari-a political party, Sikkim Sangram Parishad (SSP) chu Ningani khan Bhaichung Bhutia-a party, Hamro Sikkim Party (HSP)-ah inchhunglutin, an party flag pawh a hlan nghal.

Bhaichung Bhutia chuan SSP-in an party flag an hlan hi lo pawmin, HSP flag thar, rawng var leh a sen inpawlh chu a tlangzarh nghal a ni. Bhutia chuan Bhandari-a hnathawh leh, Sikkim hmasawnna tura a hmathlir neihte pawh chhunzawm zel a tum tih a sawi bawk.

Sikkim Sangram Parishad hi September thlaa Election Commission of India (ECI) in unrecognised political party register 86 a paih zingah khan a tel.

Bhandari hian kum 1977 khan Sikkim Janata Parishad a din a, kum 1979 state assembly inthlanah an chak a, chief minister a ni zui a ni. Kum 1984-ah a party hi ṭhiatin party thar, Sikkim Sangram Parishad (SSP) hi a din leh a, kum 1985 state assembly inthlanah chakin a ṭum hnihna atan chief minister a ni leh a ni. Kum 1989 inthlanah khan SSP hi Sikkim Assembly House-a seat awm zat, seat 32 chu an la vek a ni.

Kum 1994 inthlanah SSP hian Pawan Kumar Chamling kaihhruai Sikkim Democratic Front a hneh zo lo a, 2014 inthlanah khan political party thar, PS Golay kaihhruai Sikkim Krantikari Morcha an thlawp a ni. Bhandari hi kum 2017, July 16 khan a thi a ni.