Nagaland : Naupang rukbona thleng thei lakah school-te fimkhur turin hrilh

Nagaland school education department chuan state chhunga naupang rukbo thleng report a awm leh ṭhin avangin school tinte chu fimkhur turin a chah.

Department principal director, Thavaseelan K chuan sorkar leh private school tinte tana hriattirna tichhuakin, khauh taka inkaihhruaina kalpui turin a ti. School chhunga zirlaite hmu tura kalte enfiah tur leh, tunge an nih chhui chiang tura zirtirtu pakhat tal dah zel turin a ti a ni.

Subject teacher tinte chu an period-a naupang awm zat chu first period attendance nena en mil zel tur te, an period-a naupang kim lo an awm chuan school lam thuneitute bakah, nu leh pate hrilh hriattir nghal zel turin a ti a ni. Zirlai, zirtirtu leh nu leh pate chu police department thawhpui a ṭul thu inzirtir fo turin a ti bawk.

Movie clip, play, painting, competition leh awareness campaign hmangin school thuneitute chu zirlai naupangte hnena rukbo an nih theihna laka inven dan zirtir ṭhin turin department chuan a hriattir bawk a ni. Zirlai naupang chu an chunga thil thleng a awm palha hman turin emergency phone number pahnih tal leh, address pahnih ( nu leh pa leh zirtirtu tu emaw ber) tal chhinchhiah tir tur an ni, tiin department hriattirna siam chuan a tarlang.