Manipur sorkarin draft liquor policy tichhuak

Manipur state chhung hmun ṭhenkhatah zu khapna dan hlih chu civil society organisation-ten an dodal mek chungin Nilaini khan state sorkar chuan Draft Manipur Liquor Regulation Policy a tichhuak.

Draft liquor policy-ah hian an thil tum leh hmalakna tur chu dan kalha zu zawrh leh in, zawrh tura phurhkual ṭhin titawp a nih bakah, tualchhunga zu siamte leh IMFL (Indian Made Foreign Liquor)/ FMFL (Foreign Made Foreign Liquor)-ah pawh khuahkhirhna siam a nih thu tarlan a ni. Zu hi kum 25 hnuai lam hnenah hralh phal a ni dawn lo a, sorkarin license a pek outlet-ah bak zawrh phal a ni dawn lo bawk.

Zu zawrhna hmunte hi national highway, hospital, zirna in leh sakhaw biakna in aṭanga meter 100 chinah siam phal a ni dawn lo a, kar khata ni khat tal hralh chhuah theih loh ni, 'dry day' an siam tur a ni a, hei bakah hian national/state holiday leh sorkarin ni bik a puanahte hralh chhuah khap a ni bawk ang.

Zu ṭha lo siam leh hralhchhuah ṭhin venna turin, Manipur-a zu siam, FSSAI certificate nei lo chu hralh khap a ni dawn bawk.

State sorkar chuan tualchhunga thar chhuah thèi hmanga beer leh wine siam chu chawilar a tum dawn a, hei hian ṭhalai tam tak tan hnathawh tur pawh a siamsak thei dawn tih draft chuan a tarlang bawk. Tualchhung siamte chawilarna atan hian GI (Geographical Indication) tag pawh an dil dawn a ni.