Meghalaya : BJP-in NPP kaihhruai sorkar thlawp zel dawn

Meghalaya-a National People's Party (NPP) kaihhruai Meghalaya Demcoratic Alliance (MDA) ṭangrual sorkar chu an thlawp zel dawn tih BJP hruaitu Sanbor Shullai chuan a sawi.

BJP Meghalaya in-charge M Chuba Ao chuan Meghalaya chief minister Conrad K Sangma chu eiruknaa inhnamhnawiha puh a nih chungchangah, thla hmasa khan a kaihhruai MDA sorkar an thlawp zel dawn tih chu an party-in an ngaihtuah ṭha dawn tih a lo sawi tawh a ni.

Mahse Nilaini khan Sanbor chuan ṭangrual sorkar aṭangin BJP chu a inhnukdawk dawn lo a, a term zawh thlengin an thlawp dawn tih a sawi. Meghalaya BJP president Ernest Mawrie pawhin Sanbor thusawi hi zawmin, Ao hian state chhunga party hruaitu dangte berawn loin thu a lo sawi niin a tarlang a, a thusawi chungchang hi central lama an party hotute pawh a hriattir thu a sawi. Ao hian NPP chu BJP vanga MDA sorkar siam thei niin a sawi.

Member 60 awmna, Meghalaya assembly-ah hian MDA hian MLA 48 a nei a, an zingah BJP MLA pahnih an tel. NPP hian MLA 23 a nei mek bawk.