Hmarchhak tana tourism budget Rs vbc 10,000-a tipung turin ngen

MSME Export Promotion Council (MSME EPC) chuan sorkar laipui hnenah hmarchhak bial tana tourism budget chu Rs vbc 10,000-a tipung turin a ngen a, hemi hmang hian ṭhalai nuai thum vel tan hna thawh tur siam thar theih a ni dawn a ni, a ti.

Northeast Paradise For Tourism: Need For Developing Tourism Markets tih hmanga zirchianna a neihah, export promotion body chuan sorkar laipui chuan hmarchhak biala tourism sector tihchangtlung leh hmasawnna turin budget hi tipung turin a rawt a ni.

He zirchianna hi MSME EPC-a Northeastern Economic Development Division leh BillMart FinTech-te buatsaih a ni a, sorkar laipui hnenah hmarchhak biala state pariat-ah, state sorkar nena thawkdunin tourist centre pahnih ṭheuh din a, infrastructure ṭha nena thuam vek turin an rawt bawk.

MSME EPC Chairman D S Rawat leh BillMart Fintech Founder-CEO Jigish Sonagara-te chuan he zirchianna hi Ningani khan an tlangzarh a ni. Hmarchhak biala tourism hmasawnna turin private sector-ten investment an tih duhna tura financial package ṭha tak siamsak an ṭul thu an sawi bawk a ni.

Rawat chuan, "State tinah tourist centre pahnih ṭheuh siam a nih chuan, direct-in mi nuai 1.5 vel tan hnathawh tur a awm thei nghal dawn a, indirect-in hetiang zat vel bawk hian hna thawh tur an neih phah bawk ang. He industry hi hna tam tak siamtu a ni nghal dawn a ni," a ti. Tourism sector tihhmasawn chuan hmarchhak biala hna thawh nei loh vanga harsatna awmte pawh nasa takin a sutkian phah dawn a, consumer market-te siamin, start-up lam pawh an uar phah ang a, state tan sum lakluhna ṭha tak a insiam nghal dawn a ni, tiin a sawi.