Meghalaya-ah zirtirtute leh police-te innawr

Meghalaya-a kum hnih liam taa Meghalaya Teachers Eligibility Test (MTET) an paltlang loh avanga ban tak, contract teacher 800 chuangte chuan an hna ngaia dah let phutin Ningani khan nawrh an huaihawt. Nawrh huaihawtte hi Shillong-a Secretariat bulah police-te nen innawr buaiin, police-te hian tear gas te an hmang a ni.

Contract teacher ban takte hian Meghalaya Government Lower Primary Contractual Teachers' Association (MGLPCTA) hmingin nawrh hi an huaihawt a ni. Secretariat building chhunga luh luih an tum chu police-te hian lo dangin, tear gas an phuh bakah ṭhenkhat chu tiangin an lo vaw bawk.

Police-te chet dan hi pawl hrang hrangin an dem thu an sawi a, Khasi Students' Union (KSU) chuan thupek tichhuaktute laka action lak an phut thu an sawi. Voice of People Party (VPP) pawhin home minister Lahkmen Rymbui chu bang turin an phut tih an sawi bawk.

Chief secretary DP Wahlang chuan nawrh huaihawtte nena inbiak a rawt a, mahse anni lam hian a rawtna hi an lo hnawl a ni. MGLPCTA leader Birbor Riangtem chuan an thil phut chungchangah chief minister Conrad K Sangma pawh vawi sarih an hmu tawh a, an thil phutte pawh lo enfiah a tiam ṭhin a, kum hnih hnuah pawh hmalakna engmah an la nei lo a ni, a ti.