Assam CM-in Australia Cricket Team bus beih dem

Assam Chief Minister Sarbananda Sonowal chuan tun hnaia Australia Cricket Team bus beih a nih chu a dem thu a sawi.

Assam khawpui Guwahati-ah Thawhlehni khan Australia cricket team leh India teamte an inkhel a, India team te hi wicket 8-in an tlawm a ni. Inkhel zawh hnua Australia cricket team-te'n an thlenna hotel an pan chu mi ṭhenkhatten lungin an lo vawm a, bus darthlalang te pawh an vawm keh a ni. Vanneihthlak takin darthlalang an vawm keh zawnah hian ṭhu an awm lo a, Australian player zingah hian hliam tuar an awm loh phah a ni.

He thil thlengah hian Assam Cricket Asso­ciation (ACA) leh Assam police-te chuan venhimna an pek ṭhat tawk loh avangin dem an hlawh hle.

Hetih lai hian ACA Secretary Pradip Burgo­hain chuan security lam ṭha thei ang ber tura an inbuatsaih thu leh khatiang thil a thleng thei kha mak a tih thu a sawi a, Australia team thlenna hotel bula thleng a nih thu a sawi bawk.

Assam CM Sarbanada Sonowal chuan he thil thleng hi pawi a tih thu leh, pawikhawihtute chetna chu a dem takzet thu a sawi. Hetih rual hian pawikhawihtute chu zawnchhuah a, dan anga hrem an nih ngei tur thu a sawi bawk. Sonowal hian Assam DGP Mukesh Sehay chu he thil thlenga mawhphurtute chhuichhuak vat turin a chah a ni.

Assam police-te he thil thleng chuangchangah hian rinhlelh mi pahnih hian an man tawh a ni.