Sports University-in footballer tam zawk a chherchhuak ang : Manipur CM

Manipur Chief Minister Biren Singh chuan Thawhlehni-a Manipur Police raising day vawi 125 lawmnaa thu a sawiah, Sports Uni­versity din a nih hun­ah Manipur chuan inter­national footballer tam zawk a chherchhuah tur thu a sawi.

Manipur CM chuan, "He state hian interna­tional footbller eng emaw zat a lo chherchuak tawh a, National Sports University peihfel a nih hunah chuan player tam zawk a la chherchhuak dawn a ni" a ti. Biren Singh chuan Manipur player-te'n an theihna te pholangin ramdang mi coach mit an tlun thu a sawi a, hmeichhe footballer pawh ṭhahnem tak an state aṭanga national leh international team a tel an awm thu a sawi bawk.

CM chuan Imphal West district-ah Koutruk mipuiten Sports univer­sity atana an ram an pek thu a sawi bawk a, Prime Minister Narendra Modi pawn he university din nan hian cheng vaibelchhe 100 a ruahman niin a sawi. Manipur CM hian a thusawi naah hian FIFA World Cup-a India tana goal khung hmasa ber Manipur Jeakson Thou­naojam chu a fak bawk.

Sorkar laipui chuan Manipur-ah hian National Sport University din a remti a, hma pawh lak chhoh mek a ni. Hetih lai hian a dinna hmun tur chungchangah Congress sorkar hun lai aṭang tawhin buaina a awm a, hma lakna pawh a tiṭhuanawp a ni. BJP kaihhruai sorkara a din hnuah hmalakna hi thar thawh leh ni a, a hmun tur pawh thlan fel a ni tawh bawk. Hei hi puitlin a nih chuan hmarchhaka Sports University hmasa ber tur a ni ang.