Hmarchhak power minister-te ṭhukhawm
Hmarchhak state pariat-a power minister-te chuan Nilaini khan Shillong, Meghalaya-ah North Eastern Region Power Commttee (NERPC) meeting an nei. He hunah hian power project lama hmasawnna tur hrang hrangte sawiho a ni.
NERPC ṭhutkhawmnaah hian Arunachal Pradesh Power Minister Tamiyo Taga chuan, an state chhunga power project an kalpui mumal theih loh chhan chu Assam-a pawl ṭhenkhatten project an dodal ṭhin vang a nih thu a sawi. Taga chuan, Arunachal Pradesh chu India rama powet hmunpui a nih thu a sawi a, power MW 50,000 aia tam mah an siamchhuah thu a sawi.Power project 300 aia tam kalpui turin, MoU ziah a nih thu a sawi a, mahse heng project hi pakhatmah kalpui a la ni lo tih a sawi.
Brahmaputra lui-ah pawh hydel project tam tak siam a ni a, mahse Arunachal chhungah erawh pakhat mah siam a nilo tih sawiin, hei hi lui mawng lama awm ten an duh loh vang niin a sawi. Assam a pawl
ṭhenkhat, Arunachal chhunga power project kalpui tum duh loa nasa taka sawiselten China sorkar project erawh an sawisel loh thu a sawi bawk.
Nagaland power minister C.Kipili Sangtam chuan, hmarchhak biala hmasawnna nasa tak avangin sorkar laipui chu power project kalpuina tur senso zawng zawng tum vek turin a nawr ve thung a, ram rohlu a nih avangin sorkar laipui pawhin a ngai pawimawh tur a ni, a ti. Tripura power minister Manik Dey ve thung chuan Union Power Ministry chu hmarchhak biala power project kalpuina tur chu Integrated Power Development Scheme (IPDS) leh Deen Dayal Upadhyaya Gram Jyoti Yojana scheme te hmanga chhuhsakah a puh a ni.
Assam Minister of State for Power Pallab Lochan Das chuan sorkar laipui chu hmarchhakah hmalakna chak zawk nei turin a ngen a, region dangte nena inthlunzawmna ṭha zawk nei tura hma la turin leh, heng a senso 90% chu tum turin a ngen bawk a ni.
NERPC Chairman leh Meghalaya power minister ni bawk Comingone Ymbon pawhin sorkar laipui chu power sector lamah hmarchhak state te chu a bik taka ngaihven turin a ngen a, hemi kawnga hmalak theihna tur hmun tam tak a awm thu leh hmalakna a la awm loh thu a sawi bawk.