Assam Chief Minister-in Barak Valley Project zo thuai turin ngen
Assam Chief Minister Sarbananda Sonowal chuan Nilainia Barak Valley-a kawngpui siam mek hna a enthlithlainaah, district pathuma Barak Valley project hnuaia kawngpui siam te chu November 15-a zo hman turin a ti.
CM Sonowal chuan kawngpui ṭha neih vat a pawimawh thu sawiin, kawngpui siam hna kalpui mek chu mipuiten an hman ṭangkai ngei tur thu a sawi. CM chuan kawngpui siam hna thawh kawnga inhnamhnawih zawng zawngte chu November 15-ah emaw, Namami Barak Festival hma emawa zo hman ngei turin a ti a ni. Chief minister hi Barak Valley Project review committee-ah chairman a ni nghal bawk.
Sonowal hian heng district-a deputy commissioner-te pawh kawngpui siam hna tikhaihlak thei reng reng thil chu dahbo turin a ti a, PWD minister Parimal Suklabaida pawh kawng siam hna uluk zawka enpui turin a ti a ni. Chief Minister chuan Barak Valley chu sumdawnna hmunpuia siam an tum thu a sawi bawk a ni.
Barrak Valley Project enthlithlaina an neihnaah hian state legislative assembly deputy speaker Dilip Kumar Paul, MLA, PWD leh Forest lam hotute mai bakah he project kalpuitu contractor-te pawh an tel bawk a ni.