Manipur HC-in zángna-dawmna pe turin hriattir

Manipur High Court chuan kum 2009-a kahhlum Naoba Ngangbam-a chhungte hnenah cheng nuai nga pe turin state sorkar a hriattir.

Human Rights Law Network director Meihoubam Rakesh chuan Court thutlukna hi sorkar hriattir a nih tawh thu a sawi. May 6, 2009 khan police commando team-te chuan Imphal west district, Uripok-a Naoba Ngangbam-a chenna in an bei a, Naoba Ngangbam hi an that zui a ni. Police-te chuan Naoba Ngangbam hi helpawl mi leh saah puhin an that nia sawi a ni. He thil thleng chungchang hi court-ah thlen a ni a, tun hnai khan thutlukna hi puan a ni.

Naoba Ngangbam-a nu, Kamalini Ngangbam chuan March 31, 2010 khan hemi chungchang hi High Court-ah a thlen a, High Court chuan District and Sessions Court judge, Imphal East chu hma la turin a hriattir. Court chuan Naoba Ngangbam hi hel mi leh sa a nih leh nih loh finfiahna awm loin, police-te hian dimdawina awm miah loin an that a ni, a ti. High Court chuan Ningani khan hriattirna hi a chhuah a, Manipur sorkar chu Naoba Ngangbam-a nu Kamalini Ngangbam hnenah cheng nuai nga pe turin a ti a ni.

Supreme Court chuan Manipur-ah hian finfiahna awm loa inbeihna thleng ṭhin avangin mi 1,528 chuangin harsatna an tawk tawh niin a tarlang bawk.