Khasi ṭawng 8th Schedule-a telh turin hma la dawn

Meghalaya State sorkar chuan Ningani khan thutlukna siamin, 8th Schedule of the Constitution-a Khasi ṭawng telh ngei a nih theihna tura hma la turin Advisory Committee a din dawn.

Khasi Author's Society (KAS) ten Ni­ngani a Chief Minister Dr Mukul Sangma-a an kawmnaah, CM hian he committee hi din ngei a nih tur thu a sawi a ni. KAS president Dr DRL Nonglait chuan Chief Minister in Advisory Committee hi an din ngei dawn thu leh Khasi Ṭawng Eight Scheduled a telh a nih ngei theih nana hma lak an tum tih a sawi thu a tarlang a ni.

KAS hian Chief Minister hnena Memorandum an thehluhah, 1972-a Assam aṭanga Meghalaya ṭhen hran a nih aṭang khan Khasi mipui te chuan an ṭawng chu recognition pek a nih an beisei hle thu an ziak tel. KAS thuchhuahin a tarlan danin Kahsi ṭawng hmang hi state chhung leh state pawnah mi nuai 20 chuang an awm a ni. 

KAS te hian Khasi ṭawng 8th Schedule a telh mai bakah hian higher secondary school-ah Khasi hi compulsory subject-a telh turin an nawr bawk a, September 5, 2013 khan MBoSE-ah Khasi (MIL) chu Class XI leh Class XII Arts, Science leh Commerce-ah te optional subject-a dah turin an lo hriattir tawh bawk a ni.