Hel hnena ṭanpuina petu Nagaland sorkar officer pali man

National Investiga­tiong Agency (NIA) chuan kar kalta Zir­tawpni khan Nagaland sorkar officer 3 leh officer retire tawh pakhatte chu sorkar sum hmanga hel pawl ṭhenkhat an ṭanpui avangin an man. An ṭanpui hel pawl zingah hian National Socialist Council of Nagaland-Khaplang (NSCN-K) pawh an tel nia tarlan a ni.

NIA hotu pakhat chuan NIA-te chuan sorkar department hrang hrang an chhui mek thu leh, midang tam tak pawh hel pawl ṭhenkhat hnena sorkar sum pek chungchangah hian an inhnamhnawih thu a sawi. NIA-te'n an mante hi Additional Director of Agriculture V. Aza, Joint Director, Irrigation Depart­ment Hutoi Sema, Direc­torate of Fisheries-a Superintendent Kekhriesatuo Tep leh Purakhu Angami, retired Director of Tourism-te an ni.

Heng an mi mante hi Dima­pur-a Special NIA Court-ah thu­buai siamsak an ni a, tunah hian Police kutah an awm mek a ni.

Union Home Ministry hnen aṭanga August 17-a an thudawn bawh zuiin, NIA-te hian case hi an ziaklut a, he case hi Indian Penal Code hnuaia Arms Act and the Drugs and Cosmetics Act hnuaia ziahluh a ni.

NIA-te hian an thil chhui chianna aṭangin Naga hel pawl ṭanpuina kawngah hian state sorkar hnuaia department 12-te chu an inhnamhnawih tih an chhuichhuak a ni.

Kumin kumtir lam khan NIA te hian sorkar officer pathum- Joint Director/DDO, Department of Social Welfare Tulula Pongen, Joint Director/DDO, Department of Land Resources Alienba Pangjung Jamir lehUDA/Cashier, Department of Land Resources K. Lashito Sheqi-te an lo man tawh bawk a ni.