Manipur-a bomb puakah mi 11 an hliam

Manipur khawpui Imphal-ah kar kalta Zirtawpni zan khan bomb a puak a, mi 11-in hliam an tuar. Hliam zingah hian naupang pahnih pawh an tel a ni.

Bomb hi fair neihna tur hmuna puak a ni a, a puah hun tak hi tarlan a ni lo. Hliam zinga ṭhenkhat hi chu first aid pek an nih hnuah chhuah leh nghal an ni a, ṭhenkhat erawh chu enkawl zui ngai an ni. Police-te chuan scooter-a chuang mi pahnih chuan Tera-a fair neihna hmun turah hian, China siam granade chu vawmin an tlanchhe zui tih an sawi. North East Mela Association (NEMA)-in he fair hi an buatsaih a ni a, NEMA secretary Gitrchandra Leishangthem chuan he fair hi Pathianni zinga hawn tur a nih thu leh, bomb puah lai hian mela atanga bungrua leh thildang pawimawh buai­puia an awm thu a sawi.

Manipur sorkar chuan October 2 khan Kangla Park, Imphal-ah fair a lo buatsaih tawh a, fair nei tura an inbuatsaih leh mek laiin he thil hi a thleng ta ni. Kar hmasa pawh khan fair hmanna aṭanga hla vak loah bomb a lo puak tawh bawk a ni. Hemi bakah hian henglai vela college pakhat pawh tunhnai mai khan granade hmanga beih a lo ni tawh bawk.

Bomb tihpuah chung­changah hian Manipur Chief Minister Biren Singh chuan state chhunga hmasawnna awm mek ngai theilo ten heng thil hi an ti niin a sawi.

Hel pawl Kangleipak Communist Part (Peoples’ War Group)-te chuan Inrinni khan Imphal media-te hnenah email thawnin, he bomb puak hi an tih niin an sawi a, fair leh carnival-ahte kal lo turin mipuite an vau bawk a ni.