AP Governor-in ramri hmasawnna ngai pawimawh

Arunachal Pradesh Governor thar B.D. Mishra chuan Zirtawpni khan 48th Governor Conference, Rashtrapati Bhavan, New Delhi a neihah thu a sawi a, Arunachal chuan Bhutan, China leh Myanmar-te nen ramri an inṭawm avang­in ramri tihhmasawn a ngai tih a sawi.

Governor B.D. Mishra chuan ramri chheh vela khaw awmte chuan kawng hrang hrangin hmasawn an mamawh thu a sawi. Governnor chuan heng khuaa chengte hian ramri an venghim a ni, a ti.

Mishra chuan ramria khuate chuan hmasawn an mamawh thu a sawi uar hle a, Tirap, Changlang leh Longding District-te chu hmasawnna mamawh zual an nih thu a sawi bawk. Governor chuan Arunachal-ah private hna a tlem thu sawi lang bawkin, Enterprenuership Development Center din turin sorkar laipui chu a ngen nghal a ni.

Governor Conference hi kar hmasa Ningani khan President Ram Nath Kovind-a'n a hawng a, state 27-a Gover­nor-te leh union territory hrang hrang aṭangin an kalkhawm a ni. Dadra leh Nagar Haveli thuneitute mai bakah Daman and Diu leh Lakshadweep thuneitute chu a bika sawm an ni bawk.