Meghalaya-ah Rongdik lei a chim

National Highway - 62, Maghalaya South Garo Hills District-a Karukol hmunah meter 50-a sei, thing hmanga siam Rongdik lei chu Inrinni zan khan a chim a, he lei chim hian thingtlang khua 600 vel inkalpawhna a nghawng buai a ni.

He lei chim hi Garo Hills-a thing hmanga siam lei zinga a sei berte zinga mi a ni a, Inrinni zana ruah sur nasa vanga Simsang lui lianin a tichhia a ni. Rongdik lei hi Nongalbibra leh Siju aṭanga Baghmara, South Garo Hills district headquaters pawhtu ber a ni a, vawi tam tak thawmṭhat a nih tawh hnuaha Inrinni zan khan a chim ta a ni.

Khaw ṭhenkhat, he lei zawha km 50 vel leka an district headquarter thleng theite chuan km 210-a thui an kal a ngai rih dawn a ni. Karthum liamta khan South Garo Hills-a Telekhali leh Chokpot region-a lei pahnih te chu a lo chim tawh bawk. National Highway - 62, South garo Hills-ah hian thing hmanga siam lei 20 chuang a awm a ni.