Tripura-a Covid-19 kai mi 64 an tling tawh

Tripura-a 138th battalion Border Security Force (BSF) camp-ah Nilaini khan coronavirus kai mi 22 hmuh belh leh an ni. Heng mite nen hian Tripura-a Covid-19 kai hmuh tawh hi mi 64 an tling tawh a ni. 

Nilainia hri kai hmuh thar hi BSF sipai leh an chhungte vek an ni. Mipa 18, hmeichhia pakhat leh naupang pathumin he hri hi an kai tih hriat thar a ni. 

Tripura-a Covid-19 kai hmuh hmasak pahnihte chu enkawl dam an ni tawh a, hei vang hian hri kai awm lohna state-ah pawh an inpuang hman a ni. Mahse chief minister Biplab Kumar Deb-a'n an state chu hri kai awm tawh lohna hmun nia a puan aṭanga kar khat hnu, Inrinni khan BSF sipai pahnihin an kai tih hriat thar leh a ni. Hemi hnu hian heng sipaite awmna, Ambassa-a BSF camp-a sipai awmte leh an chhungte chu test runpui  neihpui nghal an ni a, mi dang eng emaw zatin he hri hi an lo kai hman tawh tih hriat a ni ta a ni.  

CM chuan hri kai hmuh belh zel ni mah se mipuite chu chiai lo turin a chah a, sorkar chuan theihtawp a chhuah zel tih a sawi. 

State chhunga hri kai hmuh belh zel an nih avangin state sorkar pawhin welfare plan eng emaw zat a siam belh a ni. Hri dona kawnga a hma tawngtute chu an thi a nih chuan an chhungte hnenah zangnadawmna cheng nuai 10 pek an ni dawn tih a sawi. 

CM chuan state chhunga APL chhungkua 50,000 te hnenah chhawmdawlna Rs 1,000 ṭheuh pek an ni dawn tih a sawi a, heng chhungkuate hian a thlawnin ration an dawng bawk a ni.