Assam : Australia Team bus vawmtu mi pali man
October 10 tlaia Guwahati-a T20 match-a India hnehtu, Australia Team-te chuanna bus lunga vawmtua puh mi pali-te chu Pathianni khan man an ni.
Heng mi pali te hi IPC section 307 hnuaia 'attempted murder' case a man an ni a, hemi mai bakah hian Section 336 (midang nun derthawnga siam), 427 (suahsualna avanga thil tihchhiat) leh 551 (thilsual tih tumna)-te hmanga thubuai siamsak an ni bawk.
Police lam hian an mi mante hi an kum zat an la tihchian loh avangin an hming an la puangzar duh lo a ni. DGP Mukesh Sahay chuan heng mi pali-te hian India chakloh kha an lak nat thu leh, T20 match an en hmaa zu an in thu a sawi a, zanriah an ei kham hnuah, Saukuchi area bula Bamunpara Chowk-a India chakloh chungchang an sawi lai mekin Australia Team chuanna bus hi an hmuh thu leh, an zinga pakhat chuan lunga a lo vawm thu a sawi. Hemi hnu hian an tlanchhe zui nghal a ni.
Australian Cricket Team bus hi Barsapara Cricket Stadium aṭanga an thlenna hotel an panna lamah lunga vawm a ni a, bus darthlalang te pawh a keh nual a ni.