Bangladesh paltlanga power pe turin sorkar laipui nawr

Tripura Power Minister Manik Dey chuan hmarchhak state-te'n sorkar laipui chu Bangladesh paltlang a,West Bengala National grid zawma power line pe tura an duh thu a sawi.

Minister Dey chuan hei hian power lama hmarchhak miten harsatna tam tak an tawh ṭhin a sutkian tur thu leh, power line pawh km 500 laia a tawi zawk tur thu a sawi. Tripura power minister chuan power chung­changa harsatna tam tak tawh a nih chhan chu hmarchhak-ah hian leimin, tuilian leh ruah nasa taka a sur ṭhin vang a nih thu a sawi bawk.

Hmarchhak state-a power minister-te leh power lam thuneitu sangte mai bakah sorkar laipui lam aiawhte chuan October 10-11 chhung khan ni hnih awh North-Eastern Regional Power Committee (NERPC) meeting vawi 18-na Shillong-ah an nei a, NERPC Chairman leh Meghalaya Power Minister ni bawk, Coming­one Ymbon chuan he hun hi a kaihruai a ni. Dey chuan West Bengal-a Baharampur leh northern Bangladesh-a Bhera­mara inkarah 400 kv double circuit km 100 vela sei transmission line a awm thu a sawi a, Baharampur-Bheramara transmission line kaltlangin India-in Bangladesh hnenah 500 MW power a supply thu a sawi bawk.

Tripura Minister chuan NERPC meeting-in Central Elec­tricity Authority (CEA), Union Power Ministry leh sorkar power company-te chu hmarchhak state a power transmission hlui tawh takte tihmasawn tura nawr an tum thu a sawi. NERPC Meeting-in cyclone, ruahsur nasa, tuilian leh chhiatna dang avanga power supply chhe ṭhin chu Emergency Restoration Sys­tem tihchangtluna siamṭhat vat ṭhin a nih theih nana hma lak nise an tih thu pawh a sawi lang bawk a ni.

Tripura Power Minister chuan hmarchhak state-te chuan Union Power Ministry aṭanga fund an dawn tur an dawn har ṭhin avanga harsatna an tawh vek thu a sawi a bawk a, hetiang a nih laia Integrated Power Development Scheme, Deendayal Upadhyaya Gram Jyoti Yojana (DDUGJY) tih vela sum tam tak a hman leh tho thu a sawi a ni.

Tun dinhmunah hmarchhak huamchhungah project kalpui tur funding pattern ratio chu 90:10 a ni a, 90% hi sorkar laipui lamin an tum ang a, 10% hi state-in a tum ve thung dawn a ni. Project ṭhenkhat erawh chu 50:50 leh 80:20 te pawh a awm bawk.

Dey hian hmarchhak state-a power minister-te chuan sorkar laipui chu project 90:10 ratio ang chi chauh sanction tura an duh thu a sawi tel bawk a ni.