HM-i'n tuilian thlen tawh lohnaah Assam siam an tum tih a sawi

Assam state tlawha zin mek, union home minister Amit Shah chuan Assam-a tuilian vanga harsatna thleng ṭhinte kum nga chhunga chinfel a, tuilian thlen tawh lohna state-a siam tumin hma an la dawn tih a sawi.

Kar liam ta Inrinni khan Guwahati-a BJP workers' meeting-ah thu sawiin, Shah chuan flood mitigation project ṭha tawk tak buatsaih mek a ni, a ti.

"BJP manifesto-ah khan Assam chu firfiaka chetna, eirukna leh tuilian laka fihlim state-a siam turin kan intiam a ni. A hmasa pahnihte chu kan tihlawhtling tawh a, tuilian thlen tawh lohnaa siam turin kum nga dang hun min pe leh rawh u,"tiin a sawi.

Assam hian kumtin tuilian ṭum 3-4 te tuarin, chhiatna nasa tak a tawk ṭhin a, tuilianin chhiatna a thlen avanga kum khata sum hloh hi Rs vbc 200 velte a tling ṭhin niin state sorkar website chuan a tarlang.

Amit Shah chuan tuilianin harsatna a thlen dante hi stakeholder hrang hrangte pawh a sawipui thu leh, North Eastern Council (NEC) hnuaiah project buatsaih mek a nih thu a sawi.

"Kum nga hnuah chuan tuilian thleng ṭhin hi hmanlai thil a ni tawh ang. Prime minister Narendra Modi chuan Assam chu tuilian thlen tawh lohna state-a siam ngei a tum a ni," a ti. State sorkar pawh tuilian thleng tur laka invenna tur ruahmanna siam turin a ti bawk.

Union Home Minister chuan Armed Forces (Special Powers) Act, 1958 (AFSPA) te hman a ngaih tawh lohna turin internal security tihchak chu BJP-in a ngai pawimawh hle tih sawiin, hmarchhak biala 80% velah he dan hi sut a nih tawh thu a sawilang bawk a ni.