'Frontier Nagaland' phûtin Walkathon buatsaih

Nagaland state khawchhak lama district paruk huama state hran, 'Frontier Nagaland' state phûtna kal zelah kar liam ta Zirtawpni khan zirlai pawl huaihawtin walkathon neih a ni a, an thil phût ngaihtuah sak turin prime minister Narendra Modi an ngen bawk.

State hran siamna tura an phut district paruk - Tuensang, Mon, Longleng, Kiphire, Noklak, leh Shamator-a chengte hi state mipuite awm zat aṭanga 48% vel niin, Assembly seat-a seat 60 awmah seat 20 an nei bawk. A ram zau zawng hi square km 8,154 chuang niin, state chhunga hnam(tribe) lian pasarih an awm.

Walkathon buatsaihtu, Eastern Naga Students Federation(ENSF) chuan state khawchhak lam bial chu kum 59 kaltaa Nagaland state a din aṭangin sorkar apiangin an ngaihthah zel a, hmasawnna lamah pawh state chhung hmun dangte aiin an hnufum bik tih an sawi.

District parukah walkathon hi neih niin, kawngzawhte hian an thil phut panga-te chu an district deputy commissioner-te hnenah ṭheuh an thehlut nghal a ni.

Eastern Nagaland Peoples’ Organisation’s (ENPO) chuan kum 2010 aṭang khan state hran pek phutin hma an la ṭan a, kumin August 9 khan rally buatsaihin, an thil phut tihhlawhtlin a nih hma chuan state leh general election-ahte khawchhak lam bialte chu an tel loh tur thu an puang.