Meghalaya-a zirtirtuten nawrh titawp

Meghalaya Government Lower Primary School Contractual Teachers’ Association (MGLPSCTA) chuan thla khat chhung nawrh an huaihawt hnuah Zirtawpni liam ta khan an nawrh an titawp.

State education minister Lahkmen Rymbui chuan zirtirtute hian Meghalaya Teacher Eligibility Test (MTET) an hmachhawn leh theihna turin kum bithliahah ngaihnathiamna siamsak an nih tur thu a tiam hnuah, nawrh hi an titawp ta a ni.

Contract-a chhawr zirtirtute hian September 7 aṭang khan an hnaah dah let leh phutin tiam chin awm loin nawrh hi an huaihawt a ni. Hun rei tak sit-in protest an neih hnuah sorkar lam aṭanga chhanna an dawn loh vangin, Ningani liam ta khan Secretariat panin kawng an zawh a, police-te nen innawr buaiin police-te hian tear gas-te an hmang hial a ni. Hei hian sawisel a hlawh zui hle.

State sorkar hian contract teacher-te hi temporary/adhoc basis-in ni 59 chhung atan a la a, mahse kum 2 -10 inkar an thawk tawh hlawm a ni.