Tripura ni thum chhung In kharkhip dawn

Tripura state pumah tukin zing dar 5 aṭang khan ni thum chhung atan inkharkhipna pumhlum kalpui ṭan a ni. 

Chief minister Biplab Kumar Deb chuan kar liam ta Inrinni khan video message tichhuakin, state pawn aṭanga hawte aṭanga hri kai hmuh an pung zel tih a sawi. Hei vang hian state chhunga hri darh zel tur venna atan test runpui neih a nih theihna atan ni thum chhung lockdown puan a ngai ta tih a sawi. 

Total lockdown hi tukin zing dar 5 aṭanga July 30, zing dar 5 thleng a awh ang. Hemi hun chhung hian essential service tih loh chu thil dang khap vek a ni tih a sawi bawk. CM chuan mipuite chu lockdown chhung hian in chhuahsan lo turin a ngen a, test an neih result azirin sorkar chuan hma lak chhunzawm dan tur a la rel ang, a ti.

Law minister Ratan Lal Nath chuan Inrinni zan khan primary health centre, community health centre, subdivision, district leh state  hospital zawng zawngah testing centre dah a ni dawn tih a sawi.  Heng bakah a ṭul a nih chuan sorkarin panchayat office leh sorkar school-ahte pawh testing centre hi a siam dawn bawk a ni, tiin a sawi. Testing team-ah hian Asha worker, Anganwadi worker, Gram Rozgar Sevak leh medicial officer pakhat zel an tel dawn a ni. 

Tripura state-ah hian Inrinni khan hri kai hmuh belh mi 105 awm lehin, Covid-19 kai hmuh chhuah tawh hi mi 3,883 an tling tawh a ni. Hri kai zinga mi  2,210 chu enkawl dam an ni tawh. Hri kai mek hi mi 1,538 an la awm a, mi 11 in an thihpui tawh bawk.