Chakma-Hajong chungchangah mipuite duh dan kan zah - AP Chief Minister

Arunachal Pradesh-a zirlai pawl lian ber, All Arunachal Pradesh Students' Union (AAPSU) chuan Golden Jubilee an lawm a, he hunah hian Chief Minister Pema Khandu chuan thu sawiin, state sorkar chuan Chakma-Hajong te chungchangah mipui duhdan an zah thu leh an dinna ngaia an la din reng thu a sawi.

Golden Jubilee lawmna hi Itanagar-a Indira Gandhi Park-ah neih a ni a, he hunah hian Assam Chief Minster Sarbananda Sonowal chu khuallian niin, mi pawimawh tak takin he hun hi an hmanpui a ni. Arunachal CM Khandu chuan assembly session kal mek chu uluk taka ngaichang turin leh, Supreme Court-in Chakma leh Hajong-te Citizenship pe tura a tih chungchanga state sorkar thutlukna te ngaichang turin a chah. Khandu chuan "Tunah chuan engmah sawi theih a la ni rih lo, legislative assembly session neih mek a ni a, TV-ah live in thil thleng lo en ula, refugee-te state chhunga an dinhmun chungchanga state sorkar dinna chu in hre thei ang" a ti.

CM chuan Chakma leh Hajong refugee-te chungchangah mawhphurtua inpuh tawna inhnialna a tam tawk tawh tih sawiin, a taka chet chhuah a hun tawh thu leh sorkar chu hemi chungchang chinfel kawngah a tlanchhiat loh tur thu a sawi. A kaihhruai sorkar chuan midang puhmawh tur a zawng dawn lo a, buaina chingfel tur hian hma a la zawk dawn a ni, a ti.

Tibetan Rehabilitation Policy (TRP) chungchang pawh sawiin, session-ah hian hemi chungchanga ngaihdan mumal zawk a chhuah tur thu leh Chakma-Hajong te nen chuan an din­hmun a inan loh thu a sawi bawk a ni.

Assembly-a Industrial Policy chung changa private member resolution lut avanga inhnialna awm chungchang sawiin, Khandu chuan heng policy te hi ennawn an ni leh ang a, stakeholder-te pawh biakrawn an ni leh dawn a ni, a ti. Heng policy chungchanga thutlukna siam a nih hmain mi thiamte rawnin sorkar pawhin Assembly-a sawiho chauh a duhtawk mai dawn loh thu a sawi bawk.

CM chuan Hydro project leh industry lama hmasawn chu sum lakluh nan leh hna siam nana thil ṭha tak ni mah se ram ngaw tichereu zawng, leilung tichhe zawng leh nunphung tikhaihlak zawnga siam a nihloh tur thu a sawi bawk.

Zirlai pawlte chu zirna kawnga hmasawn tura fuihin, sorkar pawhin state chhunga zirna lama hmasawnna a awm theih nan theihtawpa hma lak a tum thu a sawi. AAPSU chuan kum 50 a din chhung hian politician, legislator leh state level officer tam tak, Chief Minister thleng pawha an thehchhuah tawhna chu fakin IAS, IPS leh IFS an la tlem erawh pawi a tih thu a sawi bawk a, hemi kawnga hma nasa taka la turin a chah a ni.

Arunachal Pradesh chuan tun hnaia 'Best State in Education' chawimawina a dawn thu sawilangin sorkar pawn RTE Act ṭanpuina avanga sorkar school aṭanga zirlai quality ṭha tak tak an la chhuah tur thu a sawi bawk.

Minister of state for Home Kiren Rijiju pawhin he hunah hian thu sawiin, Chakma-Hajong raltlante chu a ram leilung neitute nen dinhmun khata an din loh tur thu leh, a damchhung chuan ram neitute dinhmun chu pawn lam miin an tihchhiat loh tur thu a sawi. Rijiju chuan sorkar laipuia minister a nih avangin a duh ang ang a sawi thei lo tih sawiin, mahse refugee chungchangah chuan a theihtawpa a ram neitute tana ṭan a huam thu a sawi uar hle. AAPSU-te chu social media, facebook vela an thil post leh comment-ahte inhnialna chawkchhuak thei laka fimkhur turin a chah bawk a ni.

Assam Chief Minister Sarbananda Sonowal chuan AAPSU-te chu lawm­puina a hlan a, All Assam Students' Union (AASU) leh North east Students Organization (NESO) vela theitawp alo chhuah ve ṭhin lai a hriatchhuahtir thu a sawi. Sonowal chuan Arunachal chu hmarchhaka state zau ber a nih avanga hmasawnna kawnga hmun pawimawh tak a nih thu a sawi a, Chief Minister Pema Khandu hnuaia hmasawnna nasa tak an neih ngei a rin thu a sawi. Prime Minister Narendra Modi pawhin hmarchhak chu India hmalam huna chakna pawimawh tak a ni tih hriain, hmasawnna a awm theih nan theihtawp a chhuah thu a sawi bawk a ni.

Assam CM chuan, "State hrang hrang ni mah ila hmarchhak state-te chu North East tih hian min phuarkhawm a, chuvang chuan state tina hmasawnna awm hi hmarchhaka hmasawnna thlentu a ni. Hemi a nih avang hian state tinte hi kan ṭanrual a ṭul a ni, AAPSU in state chhunga hmasawnna a thlen hi a lawmawm hle a, hmarchhak state te hian hmalam hun eng tak kan nei a ni", a ti.

AAPSU Golden Jubilee lawmna inkhawmah hian Arunachal Deputy Chief Minister Chowna Mein, Education Minister Honchun Ngandam, Lok Sabha MP Lkahimpur Pradhan Barua, NESO Advisor Samujjal Bhattacharya, NESO hruaitute leh hmarchhaka zirlai pawl hrang hrang aiawhte an tel a ni.