AP zirlai pawlten paper leak chungchangah an thil phut Tihlawhtling tura intiam turin CM Khandu an ngen

All Arunachal Pradesh Students’ Union (AAPSU) leh All Nyishi Students’ Union (ANSU) chuan Arunachal Pradesh Public Service Commission (APPSC) assistant engineer (civil) examination question paper putruk chungchanga an thil phut tihlawhtling turin, ṭawngkam ngeia intiam turin chief minister Pema Khandhu an phut.

Zirlai pawlte chuan CM-in an ngenna hi a tihhlawhtlin loh chuan nawrh huaihawtah an vau zui bawk.

AAPSU leh ANSU hian September 29 khan APPSC exam paper leak chungchangah state sorkar hnenah an thil phut pasarih an thehlut a ni. ANSU president Nabam Dodum chuan Chief Minister Office aṭanga ziaka chhanna an dawn chu a lungawi thlak loh hle a, CM hian tawngkam ngeia tihhlawhtling a tiam thu an sawi. Hetiang thil thleng lian tham tak hi CM hian a ngaihven viau a ṭul a, zinchhuah san mai chi a ni lo, a ti.

CMO hian zirlai pawl pahnihte hnenah hian a hran ve vein lehkha hi pein, CM Khandu chu a zinchhuah thu leh, a haw hunah zirlai pawl aiawhte chu a hmu dawn chauh tih a hrilh a ni.

Dodum chuan APPSC buaina, thil dik lo thleng hian mipui leh, exam hmachhawn tum mi tam tak a nghawng a, state sorkar hian hma a la thuai tur a ni tiin, AAPSC-ah hian kum 2014, 2017 leh 2022-ah thil dik tawk lo a thleng a, hei hian Commission siamṭhatna kawnga state sorkar hlawhchham zia a tilang a ni, tiin a sawi bawk.

AAPSU general secretary Ritum Tali pawhin kumin thil thleng bakah, kum 2014 leh 2017-a AAPSC-a thil thlengte hi chhui nawn leh an phut thu a sawi a, CM chuan AAPSU leh ANSU aiawhte telin, cabinet meeting a koh thuai a ngai a ni, a ti. Hei bakah hian CM chu Governor hnenah lehkha thawn a, commission official leh member-te ban turin an phut thu a sawi bawk a ni.

APPSC examination question paper putruk chungchangah hian August 29 khan candidate zinga pakhat, Gyamar Padung chuan police-ah complaint a thehlut a, Itanagar police station-ah case hi ziaklut nghalin, he thila inhnamhnawiha puh mi 10 man an ni tawh.