Tripura, Mizoram, AP-in Narcotics Control Bureau unit nei dawn : Amit Shah

Union home minister Amit Shah chuan hmarchhak state pathum - Tripura, Mizoram leh Arunachal Pradesh-ah ruihhlo do hna chak zawka kalpuina turin Narcotics Control Bureau (NCB) zonal unit siam a ni dawn tih a sawi.

Amit Shah hian Inrinni liam taa Guwahati-a hmarchhak state chief minister leh DGP-te meeting a neihpuihnaah he thu hi a sawi a ni.

Tripura Police Department official chuan, "Meeting-ah hian international border kaltlanga ruihhlo tawlhruk ṭhin leh, dan loa opium leh ganja chin a nih dan chungchangte sawiho a ni. Union Home Miniter chuan ruihhlo do hna kalpuina turin, a thawh khatna atan narcotics case tamna state pathumah hian NCB zone siam a ni dawn tih a sawi a, Guwahati NCB unit chu regional headquarters-ah siam a ni bawk ang," tiin a sawi.

Tripura chief minister Dr Manik Saha chuan an state-a ruihhlo hluar zel leh, ṭhalai leh tleirawl zingah khawih ṭhin an pun zel avangin state sorkar chuan NCB unit din chungchang hi sorkar laipui a sawipui thu state assembly-ah a lo sawilang tawh a ni.

Amit Shah chuan opium leh ganja chinna hmun siam chungchang zirchiang tur leh, a chingtute chu eizawnna dang, thil dang chin tir dan tur ngaihtuahpui turin inter-ministerial committee din a nih tur thu a sawi bawk.