Sikkim-ah Covid-19 kai pakhatin thihpui Hri kai hmuh thar zingah STNM doctor a tel
Sikkim-a Covid-19 kai zinga pakhat, kum 74 mi chu nimin zing khan Gangtok-a STNM Hospital-ah a thi a, an state-a hripui vanga thi hmasa ber a ni.
Hri kai thi hi High School headmaster pension tawh, Ghanashyam Pradhan a ni a, hypertension leh diabetes nei sa a ni. Inrinni zan khan a dinhmun ṭhat loh avangin Rongli aṭangin Gangtok-a Namgyal Memorial Multi-Speciality Hospital (STNM) Hospital hi panpui a ni a, Rapid Antigen Test hmanga test neih sak a nih hnuah Covid-19 positive a ni tih hriat a ni a, nimin zing dar 8:30 khan a thi.
Pathianni vek khan hri kai nia rinhlelh, hmeichhe pakhat kum 24 mi a thi bawk a, a test result a la chhuah loh avangin Covid-19 vanga thi a nih leh nih loh a la hriatchian loh. Sikkim-a hri kai hmuh chhuah thar zingah STNM hospital emergency ward-a duty doctor a tel a, hei vang hian emergency ward-a dam lo awmte leh nurse 14-te chu khung hran an ni.
Health Director-General Dr Pempa Tshering Bhutia chuan emergency ward-ah hian kar khat chhung chu dam lo dah luh belh a ni dawn lo tih sawiin, emergency service chu Central Referral Hospital, Manipal in a buaipui rih dawn a ni, a ti. State chhunga hri kai hmuh chhuah tawh hi mi 512 an awm tawh a, an zinga 357 chu enkawl mek an la ni.