Ui sa zawrh khap vangin NSCN(IM) in sorkar dem

Naga hel pawl, Nationalist Socialist Council of Nagaland-Isak Muivah (NSCN-IM) chuan state cabinet-in Nagaland-a ui sa zawrh a khap chu an dem thu a sawi. NSCN-IM chuan thuchhuah siamin, Naga ram chu India-in tihluihna in a luahsak a, Naga hnamte pawh mainland India-a chengte nena pianphung leh tihdan phungah pawh inanna engmah an nei lo a, an thil ei ṭhin pawh a dang vek a ni, ti. "Naga leh Indian-te chuan in anna engmah an nei lo a, kan civilization pawh a dang. Naga-te chuan an culture leh tradition-te an chhuang hle. Hei vang hian Naga mipuite chungah mihrang daih culture hi lakluh luih tir tum tur a ni lo a, kum tam tak kan lo awm tawh dan ang khan min awm tir rawh se," tiin a tarlang.

Nagaland sorkarin Hindutva chawi lar tumna kawng khata bawng sa ei khap a tumte chu na takin an sawisel bawk a, tuna ui sa an khap pawh chu politics lama mi tihlawm an tumna mai a ni, a ti.  Hnamin tihdan phung an lo neih anga an thil ei tur chungchangah thuneitute tlawn tum vanga khuahkhirhna siam chu an duh lo tih sawiin, Naga-te chuan ran chunga rawng taka chetna chu an duh ngai lo a, hemi rual hian an ransa chunga nunrawnna lantir tih chhuanlam  hmanga ui sa ei khapsak an  ni chu thil pawm thei loh a nih thu an sawi a ni. 

BJP hruaitu leh MP Maneka Gandhi-in Nagaland-a animal protection group-te hnen aṭanga ui talh tura zawrh thlalakte a dawn hnuah, Nagland sorkar chu he thilah hian inrawlh turin a ngen a, a ngenna angin Nagaland sorkar chuan ui sa zawrh hi a khap ta a ni.