Assam sorkarin Orunodoi scheme hnuaia grant pek tipung

Assam sorkar chuan direct benefit scheme (DBT), Orunodoi hnuaia thla tina grant a pek ṭhin chu Thawhṭanni aṭang khan Rs 250-in a tipung.

Chief minister Himanta Biswa Sarma chuan Orunodoi grant tihpun a nih thu hi sawiin, October 10 aṭangin Rs 250-a tihpun a ni a, hamṭhatna dawngtute hian thla tin Rs 1,250 an la thei tawh dawn a ni, a ti. He scheme hnuaiah hia Assam sorkar chuan kumtin Rs vbc 2,625 an sem chhuak dawn tih a sawi bawk.

State budget 2022-23 ah khan DBT scheme hnuaia monthly grant tihsanna tur hi tarlan a lo ni tawh a ni.

Orunodoi scheme hi hri leng vanga harsatna tawk, chhungkaw enkawltu ber hmeichhiate chhawmdawlna tura siam niin, kum 2020, October 2 khan hman ṭan a ni. Assam sorkarin flagship scheme 18 a kalpui mek zinga pakhat a ni.

He scheme hi hman ṭan a nih kum hian chhungkaw enkawltu nu ber hnenah thla tina chhawmdawlna, Rs 830 pek an ni a, kum khat hnuah Rs 1,000-a tihpun a ni.

State pumah Orunodoi scheme hnuaia hamṭhatna dawngtu hi mi nuai 20 vel an awm mek a, mi dang nuai ruk vel dah luh belh an ni dawn bawk. Kum 2021-2022-a scheme kalpuina tur hian sorkar chuan Rs vbc 1,800 a dah a ni.

Scheme hnuaia hamṭhatna dawngtu hmeichhiate hnenah direct-in thla tin ni 10-ah an bank account-ah pawisa hi dahsak an ni ṭhin. Kum hnih liam taa scheme hawn a nih tirh khan, sum an pek dan turah hian ruahmanna siamin, damdawi leina atan Rs 400, pulses kg 4 man Rs 200, chini kg 4 man Rs 40 leh thei leh thlai leina tur Rs 150 tiin ruahman an siam.

He scheme dawng thei turte chu Assam-a inbengbel, kum khata an sum lakluh Rs nuai 2 tling lo a ni tur a ni.