Border Issue : Assam leh AP sorkar aiawhte inbia

Assam leh Arunachal Pradesh-in ramri buaina an neihte chinfel dan ngaihtuah tura regional committe an din chuan Thawhṭanni khan ṭum hnihna atan inbiakna an nei leh. Report-te siam felin, an state chief minister ve ve hnenah an thehlut ang.

Guwahati-a inbiakna an neihah hian Assam sorkar aiawhte hi water resources minister Pijush Hazarika-a'n a ho a, Arunachal Pradesh aiawhte hi environment and forest minister Mama Natung-a'n a ho a ni.

Hazarika chuan committee-te hian September thla khan ramri chungchanga buaina an neihna, Assam-a Biswanath leh AP-a Pakke Kessang district-a khuate an tlawh tih a sawi. Thingtlang khaw hrang hranga chengte hi kawmin, an harsatna tawhte pawh an sawiho thu a tarlang. Hemi behchhan hian report pawh hi siam a ni dawn tih a sawi bawk.

Assam chief minister Himanta Biswa Sarma leh Arunachal Pradesh chief minister Pema Khandu-te chuan July 15 khan Namsai Declaration ziakin, state pahnihten ramri chungchanga buaina an neihte chinfel an intiam a ni. State pahnihte hian ramri km 804.1 a thui an nei a ni.