President-in IIT Guwahati-a Supercomputer facility a hawng dawn

President Droupadi Murmu chuan naktuk hian Assam a tlawh dawn a, Indian Institute of Technology (IIT) Guwahati-a ‘PARAM KAMRUPA’ Supercomputer facility leh laboratory SAMEER a hawng ang.

IIT Guwahati campus a tlawhnaah President hi Assam governor Jagdish Mukhi, chief minister Himanta Biswa Sarma bakah union minister of state for health Bharati Pravin Paward leh Assam health minister Keshab Mahanta-ten an ṭawiawm ang.

President Murmu-in India ram President a nih hnua an state a tlawh hmasak ber tura an campus a tlawh tel tur chu lawmawm an tih thu IIT Guwahati director Prof T.G.Sitharam chuan a sawi. An campus aṭang hian President hian virtual hmangin Dhubri-a Medical College and Hospital chu a hawng nghal dawn a, hei bakah hian Dibrugarh leh Jabalpur, Madhya Pradesh-a Zonal Institutes of National Institute of Virology dinna tur lungphum pawh virtual hmang vek hian a phum nghal dawn tih a sawi.

President Droupadi Murmu hi ni hnih chamin Tripura-ah vawiin hian a zin phawt dawn a, Tripura aṭangin Assam hi a pan dawn a ni.

India President a nih hnuah Murmu hian Tripura state a tlawhna hmasa ber tur a ni a, a cham chhung hian development project eng emaw zat a hawng ang. Agartala khawdai, Narsinghgarh-a National Law University siamna tur lungphum phumin, Judicial Academy a hawng bawk ang.

President hian naktukah Guwahati-Kolkata inkara khualzin phur rel tlantir chu Agartala rel station aṭangin a vailiam bawk dawn a ni.