Arunachal Assembly-in bill pathum pass

Arunachal Pardesh Legis­lative Assembly chuan Thawh­lehni khan bill pathum a pass.

Bill pass takte hi - Aruna­chal Pradesh Speaker and Deputy Speaker Salaries and Allowances(Ammendment) Bill 2017, Arunachal Pradesh Salaries Allowances of the Ministers (Amendment) Bill 2017 leh, The Arunachal Pradesh Salaries Allowances and Pension of Members of Legislative Assembly (Amendment) Bill 2017 te a ni. Parliamentry Affairs minister Bamang Felixin-a bill put luh ṭhenkhat pawh pass a ni bawk.

Assembly hian Deputy Chief Minister Chowna Mein-a bill putluh, The Arunachal Pradesh State Road (Regulation and Deve­lopment) Bill, 2015 pawh a pawmsak bawk.

House-ah hian Bamang Felix-a'n Tibetan Rehabilitation Policy, 2014 chungchanga a resolution putluh chu sawiho a nih hnuah pawm a ni. Chief Minister Pema Khandu pawn hemi chungchang hi sawiin Chakma-Hajong refugee buaina leh harsatna tam tak thlen a, citizenship neih tumte ang lo takin Tibetan mite hi chu remna leh muanna duh mi leh chenpui nuam tak an nih thu a sawi. Arunachal chhunga Tibetan cheng pawh an tlem telh telh thu a sawi bawk a ni. CM chuan he policy hian tribal te duhdan anga ramri siamah pawh a puih tur thu a sawi bawk.

MLA Tanga Byalang zawhna chhangin Khandu chuan, PMGSY scheme hnuaia kawng siam dinhmun chuan hma a sawn thu leh ruahsur vangin an hna a khaihlak deuh thu a sawi a, tunhnai thla 6-7 chhungin Ministry lam aṭanga fund an dawn loh thu a sawi bawk. Fund an dawn veleh contractor-te pawh hlawh an pek tur thu a sawi bawk a ni.

MLA Gabriel Denwang Wang­su-a'n Power Department-in mihring tha an hman tlem chungchanga resolution a put luh pawh Power Minister Tamiyo Taga chuan chhangin, hnathawktu tur chhawr belh a nih loh thu leh, Power Department lam pawhin Empowerment Committee an din thu te, Finance Department lam hnenah pawh an hrilh tawh thu a sawi a ni. Power Minister chuan he buaina hi chinfel vat a nih tur thu a sawi avangin resolution hi an hnukdawk leh ta a ni.

Education Minister Honchum Ngamdam leh Pani Taram, Parliamentary Secretary (Edn)-te chuan SSA zirtirtute dahngheh an nih dan tur chungchanga sorkar hmalakna an report avangin leh, an theihtawp chhuah an tum thu an sawi avangin Olom Panyang MLA-in SSA zirtirtu dahngheh chungchanga resolution a rawn siam pawh an hnukdawk leh bawk a ni.