AP sorkarin APPSC paper leak CBI chhuitir a ngen

Arunachal Pradesh sorkar chuan Arunachal Pradesh Public Service Commission (APPSC) assistant engineer examination-a question paper leak chungchang chu Central Bureau of Investigation (CBI) chhuitir a ngen.

Department of Personnel and Training hnenah lehkha a thawnah, state Vigilance Commissioner Kaling Tayeng chuan he case hi CBI kuta hlan a nih theihna tura a ṭul anga hma la turin a ngen a ni.

Kaling Tayeng chuan, " He case hi a serious hle a, state police-ten an chhuinaah sorkar official leh state dang mi inrawlh theih dan turte pawh an hmuchhuak a ni. Hei vang hian CBI hi an chhuizui theihna turin, an kuta hlan tura a ṭul anga hma min laksak turin ka ngen a ni," tiin a lehkhaah hian a ziak.

Ngenna lehkha a thawn rual hian Special Investigation Cell (SIC) in a lo chhui tawhnaa a record nei te pawh a thawn tel nghal bawk.

Question paper leak kaihhnawihah hian mi 10 man an ni tawh a, an zingah hian sorkar official-te pawh an tel a ni. APPSC Deputy Secretary hlui leh Deputy Controller of Examinations Taket Jerang-te pawh an tel.