Trucker-ten Nagaland sorkarin NH-2-a khuahkhirhna a siam ennawn duh

Manipur trucker-te chuan Nagaland sorkarin an state chhunga National Highway-2 a tlan ṭhin, motor liante tana thla khat chhung khuahkhirhna a siam chu ennawn an duh. Manipur sorkar hnenah hemi chungchang hi Nagaland sorkar sawipui turin an ngen a ni.

Nagaland sorkar hian October 13 aṭanga hman ṭan tura thuchhuah a siamah, Dimapur leh Khuzuma inkara National Highway-2 ah motor lian, ke 10 nei chin chu thla khat chhung an tlan a khap a ni. Hei hi rel kawng siam hna thawk mek a nih vang ni a sawi a ni.

Manipur Drivers’ Association (MDA), Senapati Drivers’ Association (SDA) leh Senapati Truck Owners’ Association (STOA) chuan Imphal-ah press conference neiin, Manipur sorkar chu Manipur festival pui ber zinga mi, Ningol Chakouba lo thleng tur avangin khuahkhirhna siamte chu thlahdul tura Nagaland sorkar sawipui turin an ngen. Ningol Chakouba hi October 27 hian an hmang ang.

MDA General Secretary, Kh Sanjoy Singh chuan festival pawimawh tak lo thleng tur thlirin, Manipur sorkar chuan Nagaland sorkar chu a biak thuai a ngai a ni, a ti. Motor lian tlan khap chuan state mipuite mamawh chawkluhna thlengin a nghawng dawn tih a sawi.