Assam-ah khaw 46-ten tuilian an tuar leh

Assam state-a October 10 aṭanga ruah nasa taka a sur leh avangin district pathum - Dhemaji, Dibrugarh leh Lakhimpur district-a khaw 46-ten tuilian an tuar leh.

Assam State Disaster Management Authority (ASDMA) chuan revenue circle pariat hnuaia khaw hrang hrangten tuilian hi an tuar nia sawiin, harsatna tawk hi mi 34,000 dawn an tling a ni, a ti. Tuilian tuar nasa ber, Dhemaji district-ah chuan harsatna tawkte awmna turin relief camp paruk siam a ni tawh.

Dhemaji district-ah harsatna tawk hi mi 15,084 awmin, Lakhimpur-ah mi 14,895 leh Dibrugarh district-ah mi 3,857 an awm. Tuilianin Lakhimpur district-a Nowboicha area-ah tui danna siam pakhat chu tichhiain, Dhemaji leh Lakhimpur-ah kawngpui pahnih an ti chhe bawk.

ASDMA thupuangtu chuan tuilian hian thlai chinna ram hectare 1,300-a zau a chim tih sawiin, Jorhat-a Neamatighat-ah Brahmaputra lui tuiin hlauhawm chhinchhiahna a pel a ni, a ti. Khaw chin zirtuten ruah a la sur chhunzawm dawn nia an sawi avangin, tuilen theihna biala chengte chu fimkhur turin an chah.