Meghalaya : Tura-ah darkar 24 chhungin bank vawi hnih rawk

Meghalaya-a Tura-ah Thawh­lehni khan bank rawk a ni a, Nilaini khan Tura Super Market-a ATM chu rawk a ni leh bawk. Pawisa bo zat hi cheng nuai 41 vel nia tarlan a ni a, he thil thleng hian Tura khaw mipuite a tiphawklek hle a ni.

Tura-a State Bank of India-ah hian mi pahnihin bank manager hnen aṭangin cheng nuai 25 an ruksak nia tarlan a ni a, hemi hnu hian ATM pawh rawk a ni leh bawk. Bank rawktute hi police lamin umzui mah se an man hman lo a ni. Nilainia ATM rawktute hian engmah tihchhiat an nei lo a, ATM-ah pawh hian pangngai takin an lut niin report chuan a tarlang.

Police lam chuan ATM rawktu hi chu tualchhung mi ngei a nih an rin thu an sawi. Bank offical-te chuan ATM-ah hian a hma zanah cheng nuai 25 dahluh a nih thu an tarlang tel bawk. ATM-a pawisa awm zawng zawng hi report-a a lan danin cheng nuai 43 vel a ni a, ATM aṭang hian cheng nuai 41 rukchhuah leh a bu. ATM hi rawk a ni tih Nilaini zing dar 11:30 vel khan hriatchhuah a ni.

West garo Hills Superintendent of Police Dr. MGR Kumar chuan mi pali rinhlelh an neih thu a sawi a, he pawikhawihna hi chiang zawka an chhui mek thu a sawi bawk a ni.

He ATM rawk chungchangah hian SIS Security contractor, he khawla pawisa dahluhpuitu chu inhnamhnawiha rinhlekh a ni bawk. ATM rawkna hmuba kal police-te hian kutzia thla te la in CCTV footage aṭangin chiang zawka thil thlen dan hriatchhuah an inbeisei.

Police thupuangtu chuan ATM-ah hian thil chhia engmah a awm loh avangin username leh password hmanga hawn ngei nia a lan thu a sawi a, ATM hnungah cheng nuai 1.5 chhar a nih thu leh, hei hian rukrutute hi an hmanhmawh hle tih a tihlan thu a sawi bawk a ni.

Garo Hills SBI AGM chuan ATM neitu chu SIS a nih thu leh police hnenah pawh an report thu a a sawi a, Guwahati aṭangin CCTV footage chungchanga enpui tura engineer an kal mek thu leh, thil awmdan chiang zawka hriat a nih vat tur thu a sawi bawk. He thil thlengah hian rinhlelh man an la awm lo a ni.