UNLFW Chiarman atan Khango Konyak thlang

United Nationals Liberation Front of Western South-East Asia (UNLFW) publicity committee chuan Thawhlehni khan thuchhuah an siam a, Khango Konyak chu UNLFW chairman thar thlan a ni.

UNLFW hi hel pawl hrang hrang - United Liberation Front of Assam (ULFA (I)), Nationalist Socialist Council of Nagaland (NSCN (K), Kamatapur Liberation Organization (KLO), leh National Democratic Front of Boroland (NDFB)-te inzawmkhawmin an din a ni.

October 13-14 chhunga INLFW general session an neihnaah, NSCN (K) vice chairman ni lai Khango Konyak chu chairman thar atan hian thlan a ni. UNLFW hian an chairman hi thuneihna sang tak an pe a, an pawl hmalak dan tur zawng zawngah thuneihna sang tak a nei a ni.

Col. Isak Sumi-a'n thuchhuah a siamah, MIP, NSCN (K), N.E Esara Foreign Secretary, NDFB leh Jibon Singha Koch, KLO te chuan WESEA region-a buaina hrang hrang awmte chinfelna tur an zawng dawn a, hemi kaihhnawihah hian programme leh policy hrang hrang an ngaihtuah dawn a ni.

An thuchhuah chuan revolution pawl hrang hrangte hian anmahni inkarah remna leh muanna an zawn thu leh inṭhian ṭhatna ṭha tak an neih thu a sawi a, an member ni lo, ngaihdan leh duhdan inang an neihpuite nen pawh inkungkaihna ṭha tak an neih theih nan hmalak an tum thu an tarlang tel bawk a ni.

WESEA-a pawl awm zawng zawngte hi Front member an nih vek loh thu leh, UNLFW leh WESEA-a pawl awm dangte chu hmunkhatah awm mah se pawl hrang daih an nih thu an tarlang bawk. WESEW sawi hian UNLFW sawina a ni lo a, UNLFW-ah chuan NSCN/GPRN, ULFA (I), NDFB leh KLO-te chiah an tel a ni an ti.

UNLFW thuchhuah chuan PDCK (Karbi) leh NLFT-te'n an pawla tel an dil tih tarlangin, chairman-in hemi chungchangah hian a hma thei ang bera hma a lak tur thu an tarlang bawk. He session-ah hian UNLFW founding Chairman boral ta SS Khaplang hriatreng nan minute hnih ngawi rengin an ding a ni.