Muslim leh Kristian-ah terrorist an awm lo : Dalai Lama

Tibetan Spiritual Leader Dalai Lama chuan Nilaini khan Manipur khawpui Imphal-ah thu a sawi a, Muslim leh Christian-ah Terrorist an awmloh thu leh terrorist an zawm tawh chuan sakhua an neih tawh loh thu a sawi.

Dalai Lama chuan, Muslim, Christian leh emaw eng sakhua ami pawh ni se, terrorist an nih chian hian chumi chuan a sakhua a kalsan nghal a ni a ti.

Tibetan hruaitu chuan US President Donald Trump-a slogan "America first" chu a duhloh thu leh tharum thawhna in engmah a chinfel loh thu sawiin, India in kum 1,000 zet tharum tel lo tradition a neih thu leh, hei hian khawvelah remna leh muanna a awm theih na kawngro a sut theih thu a sawi bawk a ni.

Lama chuan buaina zawng zawng deuh thaw hi mihringte insiamchawp a ni a, thinrimna hian mihring a tichak loin mi atihrisel lo a ni, a ti.

Chinese Communist sorkarin a huat em em, kum 1959 aṭanga India rama awm tawh, Dalai Lama chuan khawvela mihring tluklehdingawm sarih awm zinga tluklehdingawm 6-te chu Pathian fa te an ni a, tluklehdingaawn khat chu ringlo mi an nih thu a sawi a, khawvela buaina hrang hrang awmte hi inbiakremna hmanga chinfel a nih theih thu a sawi.

Dalai Lama chuan China pawn a communist ideology tih lohah chuan khawvelah remna leh muanna a awm theih nan tihtheih a neih thu a sawi a, rethei leh hausa inkar zau taka siam hi a dik lo thu leh, India leh Manipur-ah hetiang hi hmuh theiha a awm thu a sawi bawk

Kum 58 liam taa India rama refugee-a a luh thu sawiin, Dalai Lama chuan tun dinhmunah Tibetan 100,000 chuang zet chu India ramah an awm tawh mek a ni, a ti.