Sikkim-ah party bil awm loin Panchayat inthlan buatsaih dawn

Sikkim-ah November 10 hian political party bil hmanga chuhtu awm loin Panchayati Raj election neih a ni dawn.

Panchayat term hi October 12 khan a zo a, hemi ni aṭang hian Code of Conduct hman nghal a ni bawk.

Tun ṭum Panchayat inthlan neih turah hian political party hming emaw, party bil thlawp emaw hmingin tumahin an chuh dawn lo, independent vekin chuh a ni ang. Ward 1,147-ah inthlan hi neih a ni dawn a, hemi rual hian Gram Panchayat unit 197 leh Zilla Panchayat unit 122-ah inthlan neih a ni bawk ang.

Inthlan chuh tumte tan October 18 thleng nomination paper thehlut theih a ni ang. Vote thlakna tur polling station hi 1,147 siam a ni dawn a, vote nei hi mi 4,09,951 awmin, an zingah mipa 2,07,708 leh hmeichhia 2,02,243 an awm. November 10-ah vote thlakin, November 17-ah vote chhiarin result an puang nghal dawn a ni.

State election commissioner KC Lepcha chuan voters list pawh tihfel vek a ni tawh tih sawiin, Bihar aṭangin EVM pawh a thleng fel tawh a, strong room-ah dahṭhat vek an ni, a ti. A ṭum khatna atan vote box-te chu QR code nena thuam vek niin, heng box-te hi tikhawtlai an ni em tihte an chhui thei vek dawn tih a sawi. Candidate-te sum hman dan pawh uluk taka enfiah a nih tur thu leh, inthlan aṭanga thla thum chhung ngeia an sum sen zat an thehluh a ngaih tur thu election commission secretary Tshering Namgyal Bhutia chuan a sawi bawk.