Tripura : President Murmu-i'n State Judicial Academy a hawng

Tripura tlawha zin, president Droupadi Murmu chuan Nilaini khan Agartala-ah Tripura State Judicial Academy building sak thar a hawng, Tripura-a National Law University centre hmasa ber tur model a tlangzarh bawk.

President hian Agartala aṭanga km 20 vela hla, Durgabari Tea Estate-a Central Tea Processing Factory a tlawh bawk a, thingpui huana thawkte nen hun an hmang zui bawk. President chuan hnathawktute chu an fate school kaltir vek turin a ngen a, an harsatna leh mamawhnaah MLA-te chuan an ngaihven zel tur thu a hrilh.

Nilaini vek hian President hian New Capital Complex-a MLA hostel thar hawngin, Rabindra Shatabarshiki Bhawan aṭangin virtual hmangin project eng emaw zat a hawng nghal bawk a ni. Heng zingah hian kawngpui siamna turte, school leh zirlai tana hostel sakna tur project-te pawh a tel.

President hian Pushpavanta Palace-a Birendra Kishore Manikya Museum and Cultural Centre siam chu hawng bawkin, rimawi chawilarna kawngah sorkar laipui chuan theihtawp a chhuahpui tur thu a sawi.

Tripura-a eptu pawl, Communist Party of India-Marxist (CPI-M) chuan an state-a rorellai, BJP sorkar hnuaiah CPI-M party hruaitu leh activist-ten beih an tawk fo tih sawiin, lungawi lohna lantir nan President-in an state-te hi an boycott a ni.