2023 Meghalaya assembly inthlanah BJP-in seat tinah chuh vek a tum

Meghalaya assembly inthlan, nakkuma neih turah BJP chuan party malin assembly seat awm zawng zawng, seat 60-ah chuh an tum tih an sawi.

BJP hi National People's Party (NPP) kaihhruai Meghalaya Democratic Alliance (MDA) sorkarah tel mah se, tun hnaiah NPP nen an inkar boruak a ṭha lo hle. Mahse MDA an thlawpna hi a term tawp thleng erawh thlawp zui zel an tum tih an sawi a ni.

Meghalaya BJP president Ernest Mawrie chuan nakkum February thlaa assembly inthlan neih turah hian seat 60-ah an chuh vek dawn tih sawiin, central-a BJP kaihhruai sorkarin scheme hrang hrang a kalpui danah state mipuite an lungawi hle a, hei vang hian inthlanah pawh hian an che ṭha hle dawn niin media mite a kawmnaah a sawi.

Kum 2018 assembly inthlanah khan BJP hian candidate 47 siamin, seat hnih an la a ni. An party MLA zinga pakhat, Sanbor Sullai chu MDA sorkarah hian cabinet minister a ni.